2022

 2022 .. അച്ഛൻ ഓർമയായ വർഷം....... ഓരോ മരണവും വാർത്തയായ നിറയുമ്പോൾ നമുക്ക് ഉറ്റവർക്കു സംഭവിക്കാവുന്ന മരണത്തെ കുറിച്ച് മനുഷ്യനൊരിക്കലും ചിന്തിക്കാറില്ല. അത് യഥാർത്ഥമാകുമ്പോൾ അതും അവിചാരിതമായി സംഭവിക്കുമ്പോൾ കാലിടറിപ്പോകുന്നതായി അനുഭവപ്പെടും. പക്ഷെ ജീവിതം എന്ന നാടകം അവസാനരംഗം വരെ കാത്തിരുന്നേ മതിയാകൂ. നമ്മുടെ അഭിനയം നാം തുടർന്നേ മതിയാകൂ. അതിൽ വീണ്ടും സന്തോഷവും സങ്കടവും ഒക്കെ കടന്നുപോകണം. ഏപ്രിലിൽ അച്ഛന്റെ മരണം സംഭവിച്ചപോലെ ഡിസംബറിൽ എനിക്കൊരു മകൾ ജനിച്ചപ്പോൾ എത്രമാത്രം മുഹൂർത്തങ്ങളിലൂടെ ഇനിയും നമുക്ക്  കടന്നു പോകേണ്ടിവരുമെന്നു ഓർത്തുപോയി. അതെ 2022 എനിക്ക് മറക്കാനാകാത്ത വര്ഷമാകുന്നതും അതുകൊണ്ടു തന്നെ.......

എല്ലാ വർഷത്തെയും പോലെയുള്ള കണക്കെടുപ്പുകൾക്കു മനസ്സ് തയ്യാറല്ല...

അതുകൊണ്ടു ഈ എഴുത്ത്  ഇവിടെ അവസാനിപ്പിക്കുന്നു......പുതുവർഷം വരട്ടെ...പുതിയ ജീവിതനാടകങ്ങൾക്കു നമുക്ക് കാത്തിരിക്കാം. 

                

കാട്ടൂർ കടവ്

 

2022 വർഷത്തെ അവസാന വായന ആയി കാട്ടൂര്‍ കടവ് വായിച്ച് കഴിഞ്ഞിരിക്കുന്നു. സവിശേഷമായ ഒരുതരം ദേശമെഴുത്താണ് ഈ നോവല്‍. അശോകൻ ചരിവിലിന്റെ എഴുത്തുകളിൽ ദേശം കടന്നുവരുന്നതും ഇതാദ്യമല്ല. കേരളം ചരിത്രത്തിലെ നിർണായക സംഭവങ്ങളെ കോറിയെടുത്താണ് ഈ നോവൽ രചന നിർവഹിച്ചിട്ടുള്ളത്. കൽക്കത്ത തീസിസിനെ തുടർന്ന് കമ്മ്യൂണിസ്റ്റുകാരനുഭവിച്ച കൊടിയ മർദ്ദനങ്ങൾ, കമ്മ്യൂണിസ്റ്റു പാർട്ടിയിലെ പിളർപ്പ്, വസന്തത്തിന്റെ ഇടിമുഴക്കം, 2018 ലെ പ്രളയം തുടങ്ങിയവയെല്ലാം കാട്ടുർക്കടവിന്റെ പശ്ചാത്തലത്തിൽ പുനർവായനയ്ക്ക് വിധേയമാക്കുകയാണ് എഴുത്തുകാരൻ.