Clash (2016)

Eshtebak (original title)

Not Rated | 1h 37min | Drama, Thriller

Director:Mohamed Diab

Clash- മുല്ലപ്പൂ വിപ്ളവത്തിൻെറ പരിണാമം

2013-ലെ ജനകീയ പ്രതിഷേധത്തിന്റെ പശ്ചാത്തലത്തിൽ ഉള്ള സന്ദർഭത്തെ ചിത്രീകരിച്ച സിനിമ. പട്ടാളത്തെ അനുകൂലിക്കുന്നവരുടെയും മുസ്ലീം ബ്രദർഹുഡിനെ അനുകൂലിക്കുന്നവരുടെയും പ്രതിഷേധങ്ങൾക്കിടയിൽ പട്ടാളം അറസ്റ്റ് ചെയ്തവരെ ഒരു വാനിൽ അടക്കുന്നു. പട്ടാള അനുകൂലികളും ബ്രദർഹുഡിനെ അനുകൂലിക്കുന്നവരും മാധ്യമ പ്രവർത്തകരും ഒരേ വാനിൽ അടയ്ക്കപ്പെടുന്നു. അവർ തമ്മിലുണ്ടാകുന്ന തർക്കങ്ങളും വാഗ്വാദങ്ങളും അതിന്റെ പുറത്ത് തെരുവിൽ ദൃശ്യമാകുന്ന പ്രക്ഷുബ്ധമായ അന്തരീക്ഷവും സംവിധായകൻ സിനിമയിൽ കോർത്തിണക്കുന്നു. Clash ഒറ്റനോട്ടത്തിൽ തീവ്രവും പരിശുദ്ധവും ലളിതവുമായ ചലച്ചിത്ര അനുഭവമാണ്.

കടുത്ത വേനലിൽ പകൽ സമയത്ത് വാനിൽ അടയ്ക്കപ്പെട്ട സ്ത്രീകളും കുട്ടികളും പുരുഷന്മാരും ഉൾപ്പെടുന്ന തടവുകാരിൽ നിന്ന് ഇടുങ്ങിയതും തീവ്രവുമായ വാഗ്വാദങ്ങളാണ് തങ്ങളുടെ അനിശ്ചിത ഭാവിക്കു മുന്നിലും ഉണ്ടാകുന്നത്. ചിന്തിച്ചുറപ്പിച്ച, തീവ്രമായ ഉൽക്കർഷേച്ഛ നിറഞ്ഞ തിരക്കഥയും അതിന്റെ വിദഗ്ധമായ നിർവ്വഹണവും ചിത്രത്തെ ഒരു ക്ലാസിക് നിലവാരത്തിലേക്ക് ഉയർത്തുന്നു.

വാനിൽ നടക്കുന്ന സംഭവങ്ങൾ വളരെ രസകരമായി പ്രേക്ഷകർക്ക് അനുഭവവേദ്യമാകുമ്പോഴും ജനാലയിലൂടെ പിന്നാമ്പുറത്ത് ദൃശ്യമാകുന്നത് കുഴഞ്ഞുമറിഞ്ഞ ഭീകരമായ അന്തരീക്ഷമാണ്. സമർത്ഥമായ ഛായാഗ്രഹണം പ്രേക്ഷകന് കലാപന്തരീക്ഷത്തിന്റെ യഥാർത്ഥ ചിത്രം വെളിപ്പെടുത്തുന്നു. ചിത്രം ശക്തവും ബൃഹത്തുമായ ഒരു രാഷ്ട്രീയ സന്ദേശമാണ് നൽകുന്നത്. അവസാന ദൃശ്യങ്ങൾ ശരിതെറ്റുകൾ നിർവചിക്കാനാകാത്ത, പരീഹാരമില്ലാത്ത, ഒരു പ്രഹേളികയായാണ് സിനിമ പ്രേക്ഷകനിലേക്ക് പകരുന്നത്. പരസ്പരം മനസ്സിലാക്കാനോ ബഹുസ്വരതയെ അംഗീകരിക്കാനോ കഴിയാത്ത ഇടുങ്ങിയ ചിന്താഗതി കൊണ്ടു നടക്കുന്ന സമൂഹങ്ങളോ കക്ഷികളോ ഉളള എല്ലാ രാജ്യങ്ങളിലും സംഭവിക്കാവുന്ന ഒരു പരിണാമമാണ് ചിത്രത്തിലൂടെ പ്രേക്ഷകന് യഥാർത്ഥത്തിൽ 'ലഭിക്കുന്ന സന്ദേശം ....

Kalandar Sogugu (2015)

Director:Mustafa Kara

കലന്തറിലെ തണുപ്പുകാലം

മുസ്തഫ കാറയുടെ ഈ ചലചിത്രം മനുഷ്യന്റെ അതിജീവനത്തിന്റെയും പ്രതീക്ഷയുടെയും കഥയാണ്. പ്രകൃതിയോടും ദാരിദ്ര്യത്തോടും പൊരുതി മുന്നേറാനുള്ള മനുഷ്യന്റെ അഭിവാഞ്ജയുടെ പ്രതിഫലനം കൂടിയാണ് ഈ പകർന്നാട്ടം'.

മെഹ്മറ്റ് ഒരിക്കൽ ധാതു ശേഖരം കണ്ടെത്തി ധനസമ്പാദനം നടത്തിയ ആളാണ്. അതു കൊണ്ട് തന്നെ പുതിയ ധാതു ശേഖരം കണ്ടെത്തലാണ് തന്റെയും കുടുംബത്തിന്റെയും ശോഭനമായ ഭാവിക്കു നല്ലതെന്ന് മെഹ്മറ്റ് ചിന്തിക്കുന്നു. പുതിയ ധാതു ശേഖരങ്ങൾ അന്വേഷിച്ചു നടക്കുകയാണ് മെഹ്മറ്റിന്റെ ജോലി. പക്ഷെ ഭാഗ്യം എപ്പോഴും കൂടെയുണ്ടാവില്ലല്ലോ. കൂടുംബത്തിന്റെ കടബാധ്യത വർധിക്കുകയും മെഹ്മറ്റിന്റെ നിധി അന്വേഷണം നാട്ടുകാർക്കിടയിൽ അവരെ പരിഹാസ്യരാക്കുന്നു. പെട്ടെന്നുണ്ടായ മഞ്ഞുവീഴ്ച്ച മെഹ്മറ്റിന്റെ സ്വപ്നങ്ങളെ അസാധ്യമാക്കുന്നു. ഇത് മെഹ്മിറ്റിനെ കാളപ്പോരിൽ ഏർപ്പെടാൻ പ്രേരിപ്പിക്കുന്നു. ഭാര്യയുടെ എതിർപ്പുയർന്നപ്പോൾ ഇത് തന്റെ അവസാന ശ്രമമാണെന്നും ഇതും പരാജയപ്പെട്ടാൽ ഖനി തൊഴിലാളിയാകാമെന്നുമുള്ള മെഹ്മറ്റിന്റെ സത്യം ചെയ്യലിൽ ഹനീഫെയുടെ എതിർപ്പും അവസാനിക്കുന്നു.അതിലും പരാജയപ്പെട്ടതോടെ കടം തീർക്കാൻ ഏക മാർഗം കാളയെ വിൽക്കുക എന്നതാണ്. പക്ഷെരാവിലെ ഉറക്കമുണർനപ്പോൾ കാളയെ കാണാതാവുന്നു. അതിനെ തേടിയുള്ള അലച്ചിലി ൽ കുടുംബത്തിന്റെ പരിക്ഷീണത പ്രേക്ഷകന് മനസ്സിലാക്കാൻ സാധിക്കും. ഈ അലച്ചിലിൽ കുടുംബാംഗങ്ങൾ എല്ലാവരും മഞ്ഞിൽ കൂട്ടം തെറ്റി പോകുന്നുവെങ്കിലും ആ കുടുംബത്തിന്റ വീണ്ടെടുപ്പിന്റെ വിത്തുകൾ വിളയിച്ചു കൊണ്ടാണ് ചിത്രം പര്യവസാനിക്കുന്നത്.

നാലു ഋതുക്കളിലൂടെ കടന്നുപോകുന്ന സിനിമ മന്ദഗതിയിലാണ് മുന്നോട്ടു പോകുന്നത്. ക്യാമറ ശ്രദ്ധേയമായ രീതിയിൽ പ്രകൃതിയുടെ സൗന്ദര്യവും അപകടവും ചിത്രീകരിച്ചിരിക്കുന്നു. പ്രകൃതിയുടെ വെല്ലുവിളികളെ പ്രതീക്ഷയോടെ നേരിടാനുള്ള മനുഷ്യവാഞ്ജ ഈ സിനിമ പ്രതിഫലിപ്പിക്കുന്നു.

Ordinary People (2016)

Pamilya Ordinaryo (original title)

1h 47min | Drama

Director:Eduardo W. Roy Jr.

മനിലയിലെ തെരുവിൽ അരാജകജീവിതം നയിക്കുന്ന Jane, Aries എന്നീ കൗമാര ദമ്പതികളുടെ കഥയാണ് ഈ ചിത്റം. പോക്കറ്റടിയും പിടിച്ചുപറിയും ഉപജീവനമാർഗ്ഗവും മയക്കുമരുന്നും ലൈംഗികതയും ഉത്തേജകവും ആയിരുന്ന അവസ്ഥയിലേക്ക് ഒരു കുഞ്ഞ് വരുന്നിടത്താണ് സിനിമയുടെ തുടക്കം. ജീവിതരീതികളിൽ മാറ്റമുണ്ടാകുന്നില്ലെന്കിലും കുഞ്ഞിനോടുള്ള കരുതൽ അവർക്ക് സുരക്ഷാ ആശന്കകൾ ഉണർത്തുന്നുണ്ട്. ഈ കരുതൽ അവർക്ക് ഒരു മാസം പ്റായമായ കുഞ്ഞിനെ നഷ്ടപ്പെടുത്തുന്നു. സഹായവാഗ്ദാനവുമായി വന്ന ഒരു വ്യക്തി തന്നെയാണ് കുട്ടിയെ തട്ടിക്കൊണ്ടു പോകുന്നത്. കുട്ടിയെ വീണ്ടെടുക്കാൻ സമൂഹമോ സർക്കാർ സംവിധാനങ്ങളോ ഇടപെടുന്നില്ലെന്നത് പ്റേക്ഷകമനസ്സിൽ ആശന്കയുണ്ടാക്കുന്നുണ്ട്. കുട്ടിയെ വീണ്ടെടുക്കാനുള്ള വൃഥാശ്രമങ്ങൾക്കൊടുവിൽ തങ്ങൾക്ക് കുട്ടിയെ തിരിച്ചു കിട്ടില്ലെന്ന തിരിച്ചറിവിൽ കൗമാര ദമ്പതികൾ എത്തുന്നതോടെ ചിത്രത്തിനു വിരാമമാകുന്നു.

ഇതിലെ പ്രധാന കഥാപാത്രങ്ങൾ ശരിക്കും കൗമാര ദമ്പതികൾ ആയി ജീവിക്കുകയാണ്.തെരുവ് ജീവിതങ്ങൾക്ക് മാനുഷികമായ ചിന്തകളുണ്ടെന്നും നമ്മൾ കരുതുന്നതിനപ്പുറത്ത് അവർക്ക് ഒരു ജീവിതം ഉണ്ടെന്ന് പറയുന്നു എന്നതാണ് ഈ ചിത്രത്തിൻെറ വ്യത്യസ്തത. തെരുവ് ജീവിതത്തിൻെറ അരക്ഷിതാവസ്ഥയും ചതിക്കുഴികളും ചിത്റം പ്റേക്ഷക ശ്രദ്ധയിലേക്ക് കൊണ്ടുവരുന്നുണ്ട്. നിയമവും പോലീസും സാധാരണക്കാരോട് ഏത് രീതിയിൽ ഇടപെടുന്നു എന്നത് നമുക്കു കൂടി ഒരു ചൂണ്ടുപലകയാണ്. ക്യാമറാ സാങ്കേതികവിദ്യ എടുത്തു പറയേണ്ട രീതിയിൽ ചിത്രത്തിൽ ഉപയോഗിച്ചിരിക്കുന്നു.ഒരു സാധാരണ പ്രമേയം അതിന്റെ ആഖ്യാനരീതികൊണ്ടും കഥാപാത്രങ്ങളുടെ അഭിനയ മികവുകൊണ്ടും പ്രേക്ഷക ശ്രദ്ധ നേടിയെന്നതാണ് എടുത്തു പറയേണ്ട കാര്യം.

Parting (2016)

Raftan (original title)

 
1h 18min | Drama, Romance

Director:Navid Mahmoudi

നബിയെന്ന അഫ്ഗാൻ യുവാവിന്റയും ഫെരഷ് തെ എന്ന അഫ്ഗാൻ യുവതിയുടെയും പ്രണയം കേന്ദ്രീകരിച്ചാണ് കഥ മുന്നോട്ടു പോകുന്നത്. നെബി അഫ്ഗാനിൽ നിന്നും യൂറോപ്പിലേക്കുള്ള മാർഗമധ്യേ ഇറാനിലെത്തുന്ന അനധികൃത കുടിയേറ്റക്കാരനും ഫെരഷ് തെ ഇറാനിൽ താമസമാക്കിയ അഫ്ഗാൻ കുടുംബത്തിലെ അംഗവുമാണ്.

നെബിയെന്ന യുവാവിൻെറ മുഖത്തിൻെറ സമീപദ്റശ്യത്തിൽ നിന്നാണ് സിനിമ ആരംഭിക്കുന്നത്. അഫ്ഗാൻ ഇറാൻ അതിർത്തി കടക്കാനായുള്ള അശരീര നിർദ്ദേശങ്ങൾ അനുസരിച്ച് പലായനത്തിനായുള്ള ഓട്ടം നെബി അവിടെ തുടങ്ങുകയാണ്.

ചിത്രത്തിന്റെ പേര് തന്നെ ആർക്കും പൂർണ്ണ സന്ദേശം നൽകുന്ന ഒന്നല്ല. പലായനത്തിന്റെ ആത്യന്തിക ഫലമാണ് പലതിൽ നിന്നുമുള്ള വിട പറയൽ. നെബി യുടെ പലായനത്തിന് സഹോദരൻ കാരണമായുണ്ടായ നാട്ടിലെ അരക്ഷിതാവസ്ഥയും പ്രണയ സാക്ഷാത്കാരവും കാരണമാകുമ്പോൾ, പ്രണയം മാത്രമാണ് ഫെരഷ് തെയെ പലായനത്തിന് പ്രേരിപ്പിക്കുന്നത്.

പക്ഷെ നാട്ടിലെ അരക്ഷിതമായ അവസ്ഥ നെബിയെ പലായനത്തിനിടയിലും വിടാതെ പീന്തുടരന്നുണ്ട്. ഈ തുടർച്ച ഫെരഷ്തെയുമായുള്ള വിടപറയിലിന് നെബിയെ പ്രേരിപ്പിക്കുന്നു.

പലായനം ചെയ്യുന്നവരുടെ ദുരിതങ്ങളും അപകടാവസ്ഥയും നെബിയുടെ പെങ്ങൾ നടത്തുന്ന സംഭാഷണങ്ങളിലൂടെയും പലായനം ചെയ്തവരുടെ മരണത്തിലൂടെയും ചിത്രത്തിൽ പ്രതിപാദ്യമാക്കുന്നുണ്ട്.

കുടിയേറ്റ സാഹചര്യങ്ങളെ ചൂഷണം ചെയ്യുന്നവരേയും മുതലെടുക്കുന്നവരേയും, പലായനത്തിന്റെ യഥാർത്ഥ ഗുണഭോക്താക്കളെയും ചിത്രം പ്രേക്ഷകന്റെ കാഴ്ച്ചയ്ക്ക് സമർപ്പിക്കുന്നുണ്ട്.

ഓരോ പലായനവും എത്രമാത്രം അരക്ഷിതമായ അവസ്ഥയിൽ നിന്നാണെന്ന് പലായനം ചെയ്യപ്പെടുന്നവരുടെ മനോഭാവത്തിൽ നിന്ന് വായിച്ചെടുക്കാം.

ചിത്രത്തിന്റെ ഛായാഗ്രഹണം പലായനത്തിന്റെ ഭാവങ്ങൾ കഥാപാത്രങ്ങളുടെ കാഴ്ച്ചയിലൂടെ നൽകുന്നതിൽ ഏറെ സഹായിച്ചുവെന്ന് പറയാതെ വയ്യ.

പലായനം ഉയർത്തുന്ന മാനവിക പ്രതിസന്ധി ഒരിക്കലും കുറയുന്നില്ല എന്ന് മാത്രമല്ല അനുദിനം വർധിക്കുന്നുവെന്ന് വിളിച്ചു പറയുകയാണ് ഈ ചിത്രം.

സ്വന്തം രാജ്യത്ത് തന്നെ ജീവനു സംരക്ഷണം ഇല്ലെങ്കിൽ പിന്നെ ജീവൻ പണയം വെച്ച് പലായനം ചെയ്യുന്നതിൽ എന്താണ് തെറ്റ് എന്ന ചോദ്യം സിനിമ തീരുമ്പോൾ പ്രേക്ഷകന്റെ മനസ്സിൽ ബാക്കിയാവുന്നു.